ຂ່າວສານ ບົດຂ່າວພິທີລົງນາມ ສັນຍາການຮ່ວມມືໂຄງການບັດນັກສຶກສາ ລະຫວ່າງ ທະນາຄານການຄ້າຕ່າງປະເທດລາວ ມະຫາຊົນ ແລະ ມະຫາວິທະຍາໄລແຫ່ງຊາດ ນະຄອນຫຼວງວຽງຈັນ, ວັນທີ: 30/05/2023

ຂ່າວສານ ສະໝັກວຽກ ແບບຟອມຕ່າງໆ ກິດຈະກໍາ & ໂປຼໂມຊັນ ຂາຍດິນ ແລະ ເຮືອນ ອີເມວ EN

ສັນຍາການຮ່ວມມືໂຄງການບັດນັກສຶກສາ ລະຫວ່າງ ທະນາຄານການຄ້າຕ່າງປະເທດລາວ ມະຫາຊົນ ແລະ ມະຫາວິທະຍາໄລແຫ່ງຊາດ

ນະຄອນຫຼວງວຽງຈັນ, ວັນທີ: 30/05/2023

ວັນທີ 30 ພຶດສະພາ 2023, ຢູ່ທີ່ ມະຫາວິທະຍາໄລ ແຫ່ງຊາດ ໄດ້ຈັດພິທີລົງນາມສັນຍາການຮ່ວມມືໂຄງການບັດນັກສຶກສາ ລະຫວ່າງ ທະນາຄານການຄ້າຕ່າງປະເທດລາວ ມະຫາຊົນ ແລະ ມະຫາວິທະຍາໄລແຫ່ງຊາດ

ຕາງໜ້າລົງນາມໃນຄັ້ງນີ້ໂດຍ ທ່ານ ນາງ ບົວໄພວັນ ນັນດາວົງ, ຮອງອຳນວຍການ ທະນາຄານການຄ້າຕ່າງປະເທດລາວ ມະຫາຊົນ ແລະ ທ່ານ ຮສ ປອ ອຸດົມ ພອນຄໍາເພັງ ອະທິການບໍດີ ມະຫາວິທະຍາໄລແຫ່ງຊາດ, ໃຫ້ກຽດເຂົ້າຮ່ວມເປັນສັກຂີພະຍານໂດຍ ຄະນະຜູ້ບໍລິຫານທັງສອງຝ່າຍ, ຄູ-ອາຈານ, ຕະຫຼອດຮອດພະນັກງານຂອງທັງສອງຝ່າຍ ກໍ່ໄດ້ເຂົ້າຮ່ວມຢ່າງພ້ອມພຽງ.

ໄລຍະຜ່ານມາ, ໂຄງການບັດນັກສຶກສາໄດ້ລິເລີ່ມຂຶ້ນມາໃຫ້ບໍລິການໃນຊ່ວງໄລຍະປີ 2013 ເປັນຕົ້ນມາ ເຊິ່ງຜະລິດຕະພັນດັ່ງກ່າວແມ່ນການພັດທະນາບັດນັກສຶກສາເປັນບັດດຽວກັບບັດເອທີເອັມ ເພື່ອນໍາໃຊ້ໄວ້ຢັ້ງຢືນຕົວຕົນຂອງນັກສຶກສາ, ຢັ້ງຢືນການເຂົ້າຫ້ອງສອບເສັງ, ໃຊ້ໄວ້ຊໍາລະຄ່າຮຽນ-ຄ່າທໍານຽມຕ່າງໆ ແລະ ສາມາດຖອນເງິນສົດໄດ້ທີ່ຕູ້ ATM. ເຊິ່ງການໃຫ້ບໍລິການດັ່ງກ່າວ ແມ່ນໄດ້ປະຕິບັດຮ່ວມກັບບັນດາສະຖາບັນການສຶກສາຕ່າງໆ ເປັນຕົ້ນແມ່ນ: ມະຫາວິທະຍາໄລແຫ່ງຊາດ, ສະຖາບັນການທະນາຄານ, ສະຖາບັນການເງິນ-ການບັນຊີ, ວິທະຍາໄລເຕັກນິກ ກະສິກໍາດົງຄໍາຊ້າງ, ວິທະຍາໄລ ຄູດົງຄໍາຊ້າງ, ວິທະຍາໄລເຕັກນິກປາກປ່າສັກ, ວິທະຍາໄລເຕັກນິກ ລາວ-ເຢຍລະມັນ ແລະ ວິທະຍາໄລເຕັກນິກ ສັບພະວິຊາ ແລະ ໂຮງຮຽນວິຊາຊີບໃນຕ່າງແຂວງຈໍານວນໜຶ່ງ.

ອີງໃສ່ສະພາບໃນປະຈຸບັນ ກ່ຽວກັບການຊໍາລະສະສາງ ແມ່ນມີບົດບາດຫັນທິດໄປສູ່ລະບົບ ດີຈີຕອນ ທີ່ທັນສະໄຫມ, ການແຂ່ງຂັນກັບເວລາ ແລະ ການເອື້ອອໍານວຍຄວາມສະດວກໃຫ້ແກ່ວຽກງານຮອບດ້ານ, ທະນາຄານການຄ້າຕ່າງປະເທດລາວ ມະຫາຊົນ ໄດ້ແນມເຫັນຄວາມສຳຄັນ ຂອດບໍລິການຊໍາລະສະສາງໃຫ້ມີຄວາມຄ່ອງຕົວ ພ້ອມທັງແນ່ໃສ່ການຮ່ວມມືເຂົ້າ

ຊ່ວຍເຫລືອແກ່ທຸກພາກສ່ວນໃນສັງຄົມລາວ, ໂດຍສະເພາະບັນດາ ວິທະຍາໄລ, ມະຫາວິທະຍາໄລ ແລະ ສະຖາບັນການສຶກສາຕ່າງໆ, ເພື່ອຫັນການຊໍາລະຄ່າລົງທະບຽນ, ຄ່າຮຽນ ແລະ ຄ່າທໍານຽມຕ່າງໆ ຂອງນັກສຶກສາ ຈາກການຊໍາລະເປັນເງິນສົດ ໃຫ້ຫັນມານຳໃຊ້ບັດເອເລັກໂຕຼນິກ ໂດຍອອກເປັນບັດນັກສຶກສາ ທີ່ສາມາດນໍາໃຊ້ເປັນບັດດຽວຄືກັນກັບບັດເອທີເອັມ ເພື່ອເປັນການປູກຈິດສໍານຶກໃຫ້ແກ່ນັກສຶກສາຮູ້ຈັກການອອມ ແລະ ເພື່ອຫຼຸດຜ່ອນການນຳໃຊ້ເງິນສົດຫັນມາໃຊ້ການຊໍາລະ ແລະ ບໍລິການທາງເອເລັກໂທຼນິກຫຼາຍຂຶ້ນ. ນອກຈາກນີ້, ຍັງສາມາດນຳໃຊ້ລະບົບເອເລັກໂທຼນິກຂອງ ທຄຕລ ເຂົ້າໃນການຮັບໃຊ້ ການຊຳລະຄ່າຮຽນຂອງນັກສຶກສາ ແລະ ຕິດຕາມການຊຳລະຜ່ານລະບົບເອເລັກໂທຼນິກຂອງ ທຄຕລ ເປັນຕົ້ນແມ່ນ: ເຄື່ອງຮູດບັດ EDC, BCEL One, BCEL I-Bank, BCEL OnePay ແລະ ຜະລິດຕະພັນອື່ນໆ.. ເພື່ອເຮັດໃຫ້ວຽກງານດັ່ງກ່າວ ຫັນກ້າວໄປສູ່ຄວາມທັນສະໄຫມ, ມີຄວາມປອດໄພ ແລະ ອໍານວຍຄວາມສະດວກແກ່ນັກສຶກສາໃນອະນາຄົດຕະຫລອດໄປ.

ນະໂອກາດນີ້ຂໍສະແດງຄວາມຂອບໃຈມາຍັງມະຫາວິທະຍາໄລແຫ່ງຊາດ ທີ່ໄດ້ໃຫ້ຄວາມເຊື່ອໝັ້ນ ແລະ ເລືອກໃຊ້ບໍລິການຂອງ ທຄຕລ ໂດຍສະເພາະວຽກງານໂຄງການບັດນັກສຶກສາ, ທຄຕລ ຈະສືບຕໍ່ພັດທະນາລະບົບການບໍລິການໃຫ້ມີຄວາມທັນສະໄໝ ແລະ ສືບຕໍ່ຮ່ວມມືກັບພາກສ່ວນອື່ນໆໂດຍຂະຫຍາຍທຸກຜະລິດຕະພັນຂອງ ທຄຕລ ແມ່ນເນັ້ນຄວາມທັນສະໄໝ, ສະດວກສະບາຍ, ມີຄວາມປອດໄພ ກວດສອບໄດ້ ແລະ ໄດ້ມາດຕະຖານສາກົນ ໂດຍຄຳນຶງເຖິງຄວາມຕ້ອງການຂອງລູກຄ້າ ບົນພື້ນຖານຄວາມຮັບຜິດຊອບສູງຕໍ່ສັງຄົມ. ເພື່ອໃຫ້ລູກຄ້າ ແລະ ສັງຄົມໄດ້ຮັບຜົນປະໂຫຍດສູງສຸດ.