ຂ່າວສານ ແຈ້ງເຊີນປະມູນລາຄາ ເພື່ອຄັດເລືອກເອົາຜູ້ໃຫ້ບໍລິການ ກໍ່ສ້າງ, ສ້ອມແປງ ແລະ ຕົບແຕ່ງ ສູນເກັບກຳຂໍ້ມູນ-ຂ່າວສານ ທຄຕລ ໄລຍະທີ II.

ຂ່າວສານ ສະໝັກວຽກ ແບບຟອມຕ່າງໆ ກິດຈະກໍາ & ໂປຼໂມຊັນ ຂາຍດິນ ແລະ ເຮືອນ ອີເມວ EN

1 ໜັງສືແຈ້ງເຊີນປະມູນ

ເຖິງ: ບັນດາບໍລິສັດຜູ້ໃຫ້ບໍລິການ ກໍ່ສ້າງ, ສ້ອມແປງ ແລະ ຕົບແຕ່ງ ອາຄານ.

ເລື່ອງ: ແຈ້ງເຊີນປະມູນລາຄາ ເພື່ອຄັດເລືອກເອົາຜູ້ໃຫ້ບໍລິການ ກໍ່ສ້າງ, ສ້ອມແປງ ແລະ ຕົບແຕ່ງ ສູນເກັບກຳຂໍ້ມູນ-ຂ່າວສານ ທຄຕລ ໄລຍະທີ II.

ທະນາຄານການຄ້າ ຕ່າງປະເທດລາວ ມະຫາຊົນ ຂໍຖືເປັນກຽດແຈ້ງເຊີນມາຍັງບັນດາບໍລິສັດທີ່ມີຄວາມສົນໃຈເຂົ້າຮ່ວມການປະມູນລາຄາໂຄງການ “ໃຫ້ບໍລິການ ກໍ່ສ້າງ, ສ້ອມແປງ ແລະ ຕົບແຕ່ງອາຄານສູນເກັບກຳຂໍ້ມູນ-ຂ່າວສານ ທຄຕລ ໄລຍະທີ II” (BCEL DATA CENTER PHASE II) ໂຄງການຕັ້ງຢູ່ບ້ານໂພນປ່າເປົ້າ, ເມືອງສີສັດຕະນາກ, ນະຄອນຫຼວງວຽງຈັນ ເຊິ່ງມີລາຍລະອຽດດັ່ງນີ້:

ການປະມູນຈະດໍາເນີນຕາມຂັ້ນຕອນການປະມູນແບບເປີດກ້ວາງ ໂດຍອີງໃສ່ໜັງສືຄຳແນະນຳກ່ຽວກັບ ການຈັດຕັ້ງປະຕິບັດກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ ເລກທີ: 0477/ກງ. ລົງວັນທີ 13 ກຸມພາ 2019.
ການປະມູນແມ່ນຈະດຳເນີນໃນຮູບແບບຂັ້ນຕອນດຽວ 2 ຊອງ (ແຈ້ງປະມູນຄັ້ງດຽວ ເພື່ອຍື່ນຊອງເອກະສານຄຸນວຸດທິ, ມາດຕະຖານເຕັກນິກ ແລະ ຊອງລາຄາໂຄງການ);
ບໍລິສັດທີ່ມີຄວາມສົນໃຈ ສາມາດພົວພັນເອົາເອກະສານ ແລະ ລາຍລະອຽດການແຈ້ງເຊີນປະມູນທີ່ຫ້ອງການອຳນວຍການ ທຄຕລ ສຳນັກງານໃຫຍ່ (ຊັ້ນ 5 ຕຶກ C) ເລີ່ມແຕ່ ວັນທີ 13 ທັນວາ 2024 ຈົນຮອດ ວັນທີ 03 ກຸມພາ 2025 (ມື້ປິດຮັບຊອງປະມູນ) ເວລາ 09:00 – 15:30 ໂມງ, ລາຍລະອຽດຊຸດເອກະສານປະມູນ ປະກອບມີດັ່ງນີ້:
- . ຊຸດເອກະສານປະມູນ 12 ພາກ (12 Sections);
- . ໃບນຳສົ່ງເອກະສານ ການປະມູນ;
- . ສັນຍາວ່າດ້ວຍການຫ້າມເປີດເຜີຍຂໍ້ມູນຄວາມລັບ;

ບໍລິສັດຕ້ອງຍື່ນຊອງເອກະສານປະມູນ ທີ່ຫ້ອງການອຳນວຍການ ທຄຕລ (ຊັ້ນ 5 ຕຶກ C) ສຳນັກງານໃຫຍ່ ພາຍໃນອາທິດສຸດທ້າຍ ກ່ອນປິດການປະມູນ ຄື ວັນທີ 27 ມັງກອນ - 03 ກຸມພາ 2025 ປິດຮັບເວລາ: 15:30ໂມງ ແລະ ຈະແຈ້ງຜົນການຄັດເລືອກບໍລິສັດ ບໍ່ເກີນ ວັນທີ 03 ມີນາ 2025;

ບໍລິສັດທີ່ມີຄວາມຕ້ອງການຊື້ຊອງເອກະສານປະມູນ ຕ້ອງເປັນບໍລິສັດລົງທຶນພາຍໃນປະເທດ ມີເອກະສານປະກອບການດຳເນີນທຸລະກິດຖືກຕ້ອງຕາມລະບຽບ ແລະ ກົດໝາຍຂອງ ສປປ ລາວ. ລາຍລະອຽດໄດ້ອະທິບາຍໃນເອກະສານ TOR ດ້ານຄຸນວຸດທິທີ່ບັນຈຸໃນຊອງຊຸດເອກະສານປະມູນ;
ບໍລິສັດຕ້ອງມີຜົນງານ ປະສົບການ “ໃຫ້ບໍລິການກໍ່ສ້າງ, ສ້ອມແປງ ແລະ ຕົບແຕ່ງ ອາຄານສູງ ຫຼື ສູນເກັບກຳຂໍ້ມູນ-ຂ່າວສານ ໃນ ສປປ ລາວ ທີ່ໄດ້ມາດຕະຖານ ໃນໄລຍະ 5 ປີຜ່ານມາ ໂດຍບໍລິສັດຕ້ອງນຳເອກະສານສັນຍາ ຫຼື ໜັງສືຮັບຮອງຜົນງານມາສະແດງ;
ຖ້າບໍລິສັດໃດທີ່ມີປະສົບການດ້ານການກໍ່ສ້າງ ຕິດຕັ້ງລະບົບ ສຳນັກງານ ອາຄານສູງ ແບບຄົບວົງຈອນຈະພິຈາລະນາເປັນພິເສດ;
ບໍລິສັດທີ່ຈະເຂົ້າຮ່ວມປະມູນຕ້ອງເປັນບໍລິສັດທີ່ສາມາດຕົບແຕ່ງເອງ ແລະ ຫ້າມເປັນການປະມູນໃນນາມນາຍໜ້າ ຫຼື ຂາຍຕໍ່ໃຫ້ບໍລິສັດອື່ນ;
ທຄຕລ ຈະສະຫງວນສິດບໍລິສັດ ໃຫ້ສາມາດເຂົ້າຮ່ວມປະມູນລາຄາໄດ້ພຽງພູດວຽກດຽວ (ໃນກໍລະນີຍື່ນເອກະສານເຂົ້າຮ່ວມວຽກງານການ ໃຫ້ບໍລິການ ກໍ່ສ້າງ, ສ້ອມແປງ ແລະ ຕົບແຕ່ງ (Utility) ແລ້ວ ແມ່ນຈະບໍ່ສາມາດຍື່ນເອກະສານເຂົ້າຮ່ວມປະມູນວຽກງານໂຄງການໃຫ້ບໍລິການ ແລະ ບຳລຸງຮັກສາ ສູນເກັບກຳຂໍ້ມູນ-ຂ່າວສານ ໄອທີ ທຄຕລ (Data Hall) ໄດ້ຕື່ມອີກ, ໃນກໍລະນີຝ່າຝືນແມ່ນຈະຖືກຕັດສິດຈາກການປະມູນ.
ສອບຖາມລາຍລະອຽດເພີ່ມຕື່ມ ກ່ຽວກັບການປະກອບເອກະສານຕ່າງໆ ກ່ອນການຍື່ນຊອງລະຫວ່າງ ວັນທີ 20 ມັງກອນ 2025 ລົງມາ. ເວລາ 09:00 – 11:30 ໂມງ ແລະ 13:00 – 15:30 ໂມງ ທີ່ໝາຍເລກໂທລະສັບ: (856)20 59 594 236, (856)20 77 467 722, (856) 20 99926663 ຫຼື ທາງ ອີເມວ: datacenter_utility@bcel.com.la. ນອກຈາກເວລາດັ່ງກ່າວແລ້ວ ທຄຕລ ຈະຂໍສະຫງວນສິດໃນການຕອບຄຳຖາມໃດໆ ທັງໝົດ.

ດັ່ງນັ້ນ, ຈິ່ງແຈ້ງເຊີນມາຍັງບັນດາບໍລິສັດຜູ້ໃຫ້ບໍລິການ ເພື່ອຮັບຊາບ ແລະ ສົນໃຈຍື່ນເອກະສານການປະມູນທີ່ກ່າວໄວ້ຂ້າງເທິງນີ້.

ຜູ້ອໍານວຍການ